Hoërskool Bastion se boogskietspan het tydens die Oktober-skoolvakansie aan die Africa Genesis Archery (AGA) Interskole SA-boogskietkampioenskappe in Polokwane deelgeneem.

Volgens die Buffels se afrigter, Annie Nolan, het 1 467 skuts van regoor Suid-Afrika aan die kampioenskappe deelgeneem.

“Die beste skole van elke provinsie het aan die kompetisie deelgeneem. Die Bastion Buffel-boogskietspan het uit 20 skuts van graad 8 tot 10 bestaan. Die span het verbasend goed gevaar,” het sy vertel.

Vier van die Bastion-skuts – Christiaan Nolan, Riaan Cilliers, Theresia Cilliers en Casey-Lee Adam – is ook in die provinsiale spanne opgeneem en het tydens die AGA Interprovinsiale SA-boogskietkampioenskappe meegeding. Annie het gesien dat dit ’n geleentheid was om Hoërskool Bastion en Laerskool Randfontein se skuts as een groep op toer te neem.

Die span het algeheel 10de uit 25 spanne behaal.

“Ek het gesorg vir ’n verskeidenheid aktiwiteite waaraan die leerders deelgeneem het, van ’n vasvra-kompetisie en besoek aan ’n melkplaas tot die Magoebaskloof Canopy-toer. ’n Besoek aan die Pieter Mokaba Sokkerstadion was vir almal ’n reuse belewenis,” het sy gesê.

Die toer het vir die meeste van die skuts ook hul eerste geleentheid gebied om Gauteng te verlaat en die Limpopo-provinsie te sien, wat volgens Annie ’n absolute belewenis was.

“Die boogskietseisoen het nou amptelik tot ’n einde gekom en dit is behoorlik op ’n hoogtepunt afgesluit. Ons kan nie wag vir die 2026-seisoen en al die hoogtepunte wat dit gaan bring nie,” het sy afgesluit.