Laerskool Krugersdorp-Noord se arendskuikens het hul eerste dag in die “grootskool” begin.

Op 13 Januarie het Noordskool sy graad een-leerders met ope arms verwelkom. Onderwysers het die jong leerders begroet, terwyl trotse ouers hul kinders aan die skool se sorg toevertrou het en hulle groet toe hulle die huis verlaat om hul skoolloopbaan te begin.

“Ons ervaar ’n mengsel van vreugde en ’n bietjie angstigheid oor ons dogter se eerste dag, maar die vreugde oortref enige onsekerheid,” vertel Sonika Kers. “Dit voel amper onwerklik dat sy reeds in graad een is.”

Francois de Bruyn het bygevoeg: “Ons voel geseënd dat ons dogter hierdie nuwe fase kan betree. Dit bied vir haar die geleentheid om te groei en te ontwikkel – ’n nuwe seisoen van haar lewe begin vandag.”