’n Plaaslike kleuterskool het op 18 September ’n spesiale besoek van verskeie nooddienste ontvang om leerders se kennis oor veiligheid uit te brei.

Volgens Protie Kleuter Akademie se skoolhoof, Helena Koekemoer, het die polisie se perde-eenheid, verkeersafdeling, plaaslike sekuriteitsdienste en paramedici die leerders besoek.

Die doel van die besoek was om die kinders meer oor nooddienste en veiligheid te leer, met spesifieke aandag aan padveiligheid. Die perde-eenheid was volgens Helena ’n besondere hoogtepunt, aangesien sommige van die kinders nog nooit ’n perd gesien of daarop gesit het nie.

Die leerders het aan speletjies deelgeneem en vrae oor onder meer verkeersligte en padveiligheid beantwoord. Dié wat reg geantwoord het, is beloon met die geleentheid om die perde te voer.

Helena sê die kinders was baie opgewonde en het die geleentheid geniet om op ’n prettige manier meer oor veiligheid te leer. Volgens haar was dit ook waardevol dat die boodskappe van ander volwassenes as hul ouers gekom het.