Dit blyk dat krieket een van die min gelukkige sportsoorte is wat relatief lig van die grendeltydregulasies so vroeg in 2021 afkom.

Aangesien daar min direkte spelerkontak is, het skole toestemming ontvang om voort te gaan met krieketoefeninge met moontlike toernooie op die horison.

So twee weke voor die skole amptelik heropen het, het Hoërskool Noordheuwel se seuns aan ‘n paar proewe op die skool se sportveld en in die nette deelgeneem.

Binne die eerste week na heropening is die eerste- en tweedespanne reeds gekies en hulle het na skool begin oefen. Veertien spelers is vir die eerstespan geïdentifiseer, en 12 vir die tweedespan.

Op Dinsdag, 16 Februarie het die eerstespan ‘n halfuur aan veldwerk bestee en ‘n uur in die nette in die warm son geoefen.

Met vyf Graad 12- en vier Graad 11-leerders wat verlede jaar vir die skool gespeel het staan die eerstespan reeds sterk en voel gereed om reeds oor ‘n week hul eerste wedstryd te speel. Daar moet egter nog besluit word wanneer die eerste skoletoernooie sal plaasvind en wanneer Noordheuwel sal kan deelneem.