Mooi houe, goeie bedoelings met Oos-gemeente-gholfdag
Die Krugersdorp-Oos gemeente het weer onlangs lede van die gemeenskap genooi om aan hul jaarliks gholfdag en fondsinsameling deel te neem.
Die Krugersdorp-Oos Gemeente het weer op Donderdag, 16 September hul jaarlikse gholfdag met groot sukses aangebied. Die doel was om fondse in te samel vir die liefdadigheidsprojekte wat hulle deur die jaar aanpak.
“Die geld word in die gemeenskap teruggeploeg. Ons doen gereeld sop- en bakkiebredie-projekte en gee skoolpakkies uit,” het Martie Dryer, gemeentelid en mede-organiseerder van die gholfdag verduidelik.
Martie het bygevoeg dat hulle ook die Skole Uitdaagbeker deur die loop van die dag aangebied het waaraan Laerskool Kenmare, Laerskool Protearif en Hoërskool Monument deelgeneem het.
Monnas het die trofee vir die derde jaar in ‘n ry gewen.
Net so oor die 100 gholfspelers het die dag die gemeente by die Krugersdorp Gholfklub ondersteun in die vierbal Betterball Stableford-formaat. Daar is ook deur die dag lootjies verkoop en die prysuitdeling is gehou kort nadat die dag se spel afgehandel is.
