Letaba het aanvanklik goed begin en sommer vroeg in die wedstryd agter die tuisspan se doellyn gaan kuier.

Swak verdediging en nog swakker spel in die vaste fasette het egter beteken dat die Groentruie deurgaans onder druk was en te min besit gekry het om enigsins iets teen die aanval uit te rig.

Veral Letaba se lynstane was skokkend en Noordelikes het die ingooie na willekeur oorheers en daar is groot gevaartekens vorentoe as dit nie dringend aangespreek word nie.

Die verdediging sal ook dramaties opgeknap moet word en hoewel daar positiewe spel by tye was, lê daar harde werk voor vir die afrigters.

In teenstelling hiermee het die tweedespan puik rugby gespeel en ‘n aanskoulike en opwindende kragmeting teen Noordelikes met 28-27 gewen.

Die wipplankstryd het verskeie mooi drieë opgelewer en die toeskouers tot met die laaste minuut vasgenael op hul sitplekke gehou.