Merensky se eerste krieketspan wen Limpopo SA20-titel
Die Plasies het hul plek onder die land se beste skoolkrieketspanne verseker ná ’n suksesvolle Limpopo-veldtog.
TZANEEN – Merensky se eerste krieketspan het op Saterdag, 14 November, die Hoërskool Ben Vorster in ‘n opwindende finaal met vyf paaltjies geklop om as die Limpopo SA20 fase 1-kampioene gekroon te word.
Die halfeindstryd en finaal is by Stanford Lake College (SLC) gespeel, waar die Plasies twee uitstekende oorwinnings behaal het.

Halfeindstryd: Merensky teen Stanford Lake College
Merensky het die loot gewen en besluit om eerste te boul. SLC is tot 77/9 in 14.2 boulbeurte beperk, met Schalk Rossouw wat vier paaltjies vir 20 lopies platgetrek het en Waldo Mouton twee paaltjies vir 20 lopies geneem het.
Merensky het die teiken gemaklik in 10.3 boulbeurte bereik en 81/3 aangeteken. Willem Mostert (27 nie uit nie) en Zander Botha (20) was die voorste kolwers. Merensky het die wedstryd met sewe paaltjies gewen en sodoende vir die eindstryd gekwalifiseer.
Eindstryd: Merensky teen Hoërskool Ben Vorster
Ben Vorster het eerste gekolf en 133/9 in sy toegelate 20 boulbeurte aangeteken.
Wean Kruger het met die bal uitgeblink deur vier paaltjies vir 22 lopies te neem, terwyl Schalk Rossouw drie paaltjies platgetrek het.
Merensky het die teiken van 134 lopies met selfvertroue aangepak en dit in slegs 17.2 boulbeurte bereik om op 134/5 te eindig. Rossouw (38 nie uit nie), Kruger (29) en Wynand Benade (22) was die voorste kolwers. Merensky het met vyf paaltjies gewen en is as die 2026 Limpopo SA20-kampioene gekroon.

Die Plasies dring nou deur na fase 2 van die kompetisie, wat van 29 tot 31 Januarie in Benoni plaasvind.




