Kom ons maak Kersfees hierdie jaar ‘n ware Afrika affêre.

Ons stuur vir mekaar luiperdvel-motief kaartjies of foto’s van waatlemoenskille.

Of in plaas van takbokke, kan ‘n span vlieënde Afrikaner osse, Kersvader (natuurlik geklee in ‘n isiZulu kryger se vel uitrusting) se slee tot op ons huise se dakke trek.

Daar moet tog iets wees wat ons kan doen om Kersfees waarlik ons eie te maak.

Ek stel voor ons vra nie die politici van ons land wat hulle sou doen om hierdie droom te bewaarheid nie.

Ek is heeltemal te bang hulle dink ons nuwe eg-Afrika tradisies van korrupsie en nepotisme sal byval vind.

Stel jou byvoorbeeld voor Kersvader lewer net vier uit elke tien geskenke af en deel die res met sy vriende, ongeag of hulle soet was hierdie jaar.

Of nog erger, wat as hy sy familielede begin aanstel, maak nie saak hoeveel ervaring of kwalifikasies hulle het of nie het nie.

Wag, dalk is die Eurosentriese Kersfees waaraan ons almal so gewoond is, nie die héél slegste idee ooit nie. As julle my soek is ek onder die mistel takke by my voordeur aan’t wag vir ‘n soen.