Daar is hierdie week verneem dat Oscar Ndlovu, wat Woensdag in Machadodorp in die hof om borg sou aansoek doen, besluit het om sy planne eerder te laat vaar en Kersfees in die tronk deur te bring.

Ndlovu het na bewering vir Cindy Swanepoel in die kop geskiet in die teenwoordigheid van ‘n poligrafis, Corne Botha, nadat daar ‘n poligraaf toets op hom gedoen is tydens ‘n ondersoek oor dieseldiefstal by hul werkplek in Belfast.

Ndlovu sal weer op 14 Desember in die hof verskyn vir ‘n uitstel en sodat die dossier, waarvan die ondersoek klaar afgehandel is, na die Departement van Openbare Vervolging gestuur kan word vir beslissing en ‘n hooggeregshof datum.