Motorfiets laasnag gesteel
’n Motorfiets is laasnag in Hoogstraat gesteel. Volgens mnr. Martin Coetzee het hy die naweek na sy broer op Middelburg verhuis. Hy het gistermiddag die motorfiets se uitlaatpyp laat regmaak en hom parkeer langs sy broer se bakkie onder die afdak.
“Toe ek vanoggend uitkom, was my motorfiets weg! Ek sou met hom Pretoria toe gery het vandag om te gaan vir ’n onderhoud!” Dit is ’n BMW 1150R, 2002 model, registrasienommer NRM 396GP.
Mnr. Coetzee sê die motorfiets was nie van die straat af sigbaar nie.
Die diewe het die palissadehek van die spoor af getel om toegang tot die erf te kry.
Die gesin se Rottweiler teef het nie alarm gemaak nie, aangesien sy aan die agterkant van die erf by haar klein hondjies was.
Lees verwante stories hier:
Klouter oor muur vir motorfiets
Die booswigte het daarna die lugdraad van die bakkie afgebreek en die deur daarmee oopgemaak.
“Ek dink die oomblik toe hulle in die bakkie klim, het hulle my motorfiets gesien en besluit om hom eerder te steel!” het mnr. Coetzee gemeld.
Mnr. Coetzee het genoem dat dit die enigste van sy soort BMW motorfiets in die dorp sal wees.
As enigiemand inligting het, kan hulle mnr. Coetzee bel by 060 970 9135 of kol. Phila Mahlangu (speurtak bevelvoerder) by 076 942 5455.
