Na wat verneem word het die Jeep waarin mnr. Pitso Obed Mojapele gery het ‘n plas water getref, waarop dit buite beheer getol en die bakkie, waarin HR werknemers, me. Maralie Wolvaardt (26) en me. Melanie MacPherson (23) gery het, trompop getref.

Me. MacPherson is opslag dood in die ongeluk en beide me. Wolvaardt en mnr. Mojapele het ernstige beserings opgedoen en is in die Life Midmed Hospitaal opgeneem.

Mnr. Ben van der Merwe (van HR City) het Vrydag gesê dat die afsterwe van me. MacPherson geweldig traumaties was vir haar kollegas en dat daar traumaberading gedoen sal word. Daar is ook Vrydag ‘n geleentheid by HR City gehou in herinnering aan me. MacPherson.

Mnr. Van der Merwe het me. MacPherson beskryf as “‘n ligstraaltjie en ‘n sterretjie wat altyd borrelend was.”

Me. MacPherson was al die jare ‘n inwoner van Middelburg en het haar matriek aan HTS Middelburg voltooi.

Sy en haar man, James, het onlangs na Rustenburg verhuis en me. MacPherson het ‘n satellietkantoor vir HR City op Rustenburg geopen.

Sy het egter steeds een keer elke twee maande na Middelburg gependel om werk te kom doen hier.

Sy was juis Donderdag in Middelburg en het besluis om saam met me. Wolvaardt ‘n kliënt op Belfast te gaan sien.

Die ongeluk het oppad soontoe in gietende reën gebeur.

Teen druktyd was die finale begrafnisreëlings nog nie gefinaliseer nie.

• Me. Wolvaardt was teen druktyd nog in die Midmed Hospitaal waar sy behandel word vir erge breuke, waaronder haar pols en rugwerwels.

Haar ma, Ansa, het gesê dat sy en Maralie “stukkend is vir Melanie se familie wat ‘n dogter verloor het.

Sy was ‘n lieflike ou mensie.”