Dit is die vraag wat die Roos-gesin vra nadat die tuindienste ‘n slang in hul tuin gevang het. Die bure het gekla hul twee katte is skoonveld en die Roos-gesin het onlangs ‘n vrot reuk tussen die bosse geruik, wat hulle laat dink het dat die slang moontlik die katte gepik het.

Die slang is vir slangkenner Victor Boshoff gevat en hy het bevestig dat dit ‘n snoetneuskobra is wat in die tuin gekry is. Hierdie slang word ook die Savanna- of Bosveldkobra genoem en is beslis nie ‘n slang wat jy in dié omgewing sal kry nie.

Mnr. Boshoff sê die slang het waarskynlik in ‘n voertuig vanaf Groblersdal of Steelpoort se kant af in Middelburg beland. Die moontlikheid dat hy onwettig aangehou is, kan ook nie uitgeskakel word nie.

Hy het bevestig dat die snoetneuskobra wel ‘n kat sal pik en dat die dier binne 40 minute sou gevrek het. Die kobra sou egter nie die kat ingesluk het nie.

Die vrot reuk wat die familie geruik het, is waarskynlik die reuk van die slang se ontlasting. As die slang stres maak hy sy maag leeg en die ontlasting stink geweldig.

Die slang het neurotoksiese gif (senuweegif) wat die slagoffer se asemhaling aantas. ‘n Kat of hond sal baie gou vrek as die slang hom pik.

In die geval van ‘n mens, sal ‘n snoetneuskobra se byt veroorsaak dat die persoon binne twee tot drie ure ‘n baie ernstige mediese geval sal wees.

• Sien die video van die snoetneuskobra:

Tipiese tekens van ‘n snoetneuskobra-byt, sluit in: benoudheid, braking, sweet en erge bleekheid. Die pasiënt kan doodgaan as hy nie behandeling ontvang nie.

Mnr. Boshoff het gesê dat dié slang wel sy kop oplig en bak maak soos die rinkhals wat in hierdie omgewing voorkom. Die snoetneuskobra spoeg egter nie. Dit is nie so ‘n aggressiewe slang soos ‘n mamba nie en sal nie sommer ‘n mens aanval nie. Hy sal eerder geepad na ‘n veiliger area.

Die snoetneuskobra word soms verwar met die Egiptiese spoegkobra wat soms in die omgewing gevind word.

• Toe mnr. Boshoff die slang uit die sak haal waarin die mense hom gesit het toe hy gevang is, het hy ‘n plastiekringetjie om die slang se nek gekry.

Hy vermoed die slang het sy kop in ‘n plastiekbottel gedruk om iets te drink, waarop die ringetjie (wat aan die onderkant van die prop is) om sy nek vasgetrek het. Toe hy dit afhaal, het daar bloed uit die slang se bek gekom.

Mnr. Boshoff sê hy sal die slang vrylaat, sodra hy seker is dat hy behoorlik kan eet.

• Mnr. en me. Bertus en Cilla Albertyn het die naweek twee skadelose klein Rooilippie-slange in hul tuin in Steynstraat (Clubville) gekry. “Toe my man die asbakkie waar hy op die stoep rook, neersit, het die asbakkie begin beweeg met die slang onder dit. Ons het erg geskrik.” Hulle vermoed ‘n nes met slangetjies het in hul tuin uitgebroei en dat hulle agter die paddatjies in die tuin aan is.

• Mnr. Boshoff se seun, Darren (16) het verlede week ‘n nagadder by ‘n huis in President Brandtstraat (Dennesig) gevang.