Vyf mense, waaronder ‘n baba, is Sondagmore 29 Junie 2014 omstreeks 03:10 beseer toe hul motor op die hoeke van Walter Sisulu- en Proteastraat, die middelman getref en gerol het.

Die polisie sê dat al vyf insittendes van die voertuig met ernstige beserings in die staatshopsitaal opgeneem is.

‘n Saak van roekeloos en nalatige bestuur is teen die bestuurder oopgemaak.

• Om 13:30 en weer om 18:30, het die bestuurders van twee motors ook onderskeidelik op die Groblersdalpad beheer verloor en die pad verlaat.

Niemand is in dié geringe botsings beseer nie.

• Om 18:50 is die polisie weer uitgeroep na Mandelastraat in Gholfsig waar die bestuurder van ‘n wit bakkie beheer oor die voertuig verloor het.

Met die polisie se aankoms op die toneel is ‘n erg beseerde passasier, mnr. Freeman Sithole, in die bakkie gevind, maar die drywer en nog ‘n passasier was skoonveld.

“Ons vermoed die drywer het weggehardloop na die botsing,” het kaptein Khanyisile Zwane Maandag gesê en bygelas dat hulle steeds na die drywer en passasier wat gevlug het, soek.

• Kort na die Mandelastraat botsing is die polisie weer na buite die dorp se grense op die Stoffbergpad uitgeroep waar ‘n Toyota Hilux met vyf insittendes ook gerol het.

Volgens kaptein Zwane is drie insittendes ernstig beseer terwyl twee vir geringe beserings behandel is.

Dié botsing het kort voor 20:00 plaasgevind.

• ‘n Geringe botsing is ook op die N4 aangemeld waar ‘n motor gerol het, hoewel die polisie sê geen inligting oor dié ongeluk beskikbaar is nie omdat niemand ernstig beseer is nie.