HTS se pawiljoene was stampvol om 14:30 met die amptelike opening van die week, waarna ‘n naelbyt wedstryd tussen die Pumas en WP gespeel is.

Die Pumas het met een punt verloor met ‘n eindtelling van 32-33 in die WP se guns.

Die wedstryd het egter almal se vermoedens bevestig, dit gaan ‘n week van opwinding wees!

Die president van die Mpumalanga Rugby-unie, mnr. Hein Mentz, was eerste aan die woord en het gaste verwelkom in die provinsie waar die son opkom, en die weer het beslis saamgespeel.

Hy het die seuns aangepor om met waagmoed en geloof te speel en hulle daarop gewys dat hulle gebore is vir prestasie en derhalwe gekies is om hul talente ten toon te kom stel in die belangrikste byeenkoms vir skole rugbyspelers in Suid-Afrika.

Na mnr. Mentz het die bemarkingsbestuurder van Coca Cola, mnr. Mpetsi Mbele, die seuns goed laat verstaan dat hulle dié week teen die land se beste spelers te staan gaan kom, maar dat hulle hulself ook onder die bestes kan tel.

Hy het hulle aangemoedig om van die geleentheid gebruik te maak om hul rugbytalent aan die nasie ten toon te stel omdat alle wedstryde regstreeks op die SuperSport kanaal uitgesaai word.

Hy het Coca Cola se volgehoue ondersteuning van die jeug benadruk en mnr. Jurie Roux, uitvoerende hoof van die SA Rugby Unie se woorde dat, “die geleentheid gebruik moet word om blywende vriende te maak en eindelaaste pret op die veld te hê,” ge-eggo.

Mnr. Thys Bezuidenhout, voorsitter van SA Skole Rugby, het die seuns aangemoedig om nie net ambassadeurs vir hul unies te wees nie, maar ook hul ouers trots moet maak.

“Die ouers wat hier sit het ‘n lewenslange verbintenis gesmee met hul seuns se sportideale, wees dankbaar,” het hy die seuns gemaan.

Hy het die lof ook toegeswaai aan die onderwysers en skole wat alles insit om hul rugbyseuns se talente te help brei.

Die burgemeester, mnr. Mike Masina, het weereens ‘n kort en kragtige verwelkoming aan die Suider-Afrikaanse rugbygemeenskap gerig.

Hy het verder die hoop uitgespreek dat hy in die nabye toekoms van die spelers in Groen en Goud sal sien, omdat honderde Cravenweekspelers reeds dié eer te beurt geval het.

Mpumalanga jeugkoor:

Mnr. Roux het in afsluiting die seuns herinner dat HTS dié week wemel van talentsoekers en dat die pad na ‘n blink toekoms vir hulle oop is.

“SA rugby is sterk omdat ons skole strukture in plek is,” het hy gesê voordat hy die Cravenweek amptelik oop verklaar en toe teruggestaan het vir die rateltaai wedstryd tussen die Pumas en WP wat maar net ‘n voorsmakie was van dit wat die week voorlê.