Gly by Woolies gaan hom kos
'n Inwoner wat in Desember 2013 so hard in Woolworths by die Oaks-sentrum gegly en geval het, dat haar stuitjie gebreek is en die pasaangeër in haar hart geskuif het, het Vrydag 'n reuse oorwinning vir Jan Alleman in die Pretoriase Hooggeregshof behaal.
Me. Danalina Margaretha Croukamp, (64), vlootbestuurder van die Mhluzi polisiestasie, moes kort na die val weer deur die trauma van ‘n opehartoperasie gaan, sodat die pasaangeër reg geskuif kon word.
Luidens die hofbevel is Woolworths ten volle aanspreeklik vir dié kostes.
Skadevergoeding vir Croucamp sal egter eers tydens ‘n volgende hofgeding bepaal word.
Me. Croucamp het op die gladde vloer by die ingang van Woolworths geval.
Daar was geen waarskuwingsborde op vir die publiek nie, en die hof het bevind dat Woolworths nagelaat het om toe te sien dat daar nie teenglymaatreëls deur die winkel ingestel is nie.
Mediese verslae sal nou ingedien word vir die hof vir skadevergoeding.
Die dagvaardiging is in Februarie op Woolworths beteken, maar die kettingwinkel het versuim om me. Croucamp se saak teë te staan.
Op gronde hiervan, is die verstekvonnis deur die hof toegestaan.
