News

‘Dankie!’ Toe vlug dief met handsak

Die straatboewe wat ’n skrikbewind voer in die sakekern is weer besig om motoriste te teister.

September 11, 2018

Tobie van den Bergh 2 minutes read

This feature is for display only. Image: Internet.

Verskeie voorvalle het die afgelope paar dae plaasgevind.

Terwyl sy makker een deur oop en toe gemaak het, het ‘n dief doodluiters by twee vroue in ‘n kar geklim en ‘n handsak gesteel.
Me. Juanita Nolte het agter die dief aangehardloop en later die handsak en leë beursie teruggekry.

Haar ma, Walda Fritz (60), sluit altyd haar deure, maar het die dag vergeet.

Lees ook: Sagte reus na moord begrawe

Die oomblik toe hulle op die hoek van Cowen Ntuli- en OR Tambostraat (Sentrale Sakegebied) stop, het die een deur skielik oopgegaan, maar is dadelik weer toegemaak.
Me. Fritz het nog vir die man dankie gesê, want sy het gedink die deur is nie mooi op knip nie. Net daarna het hy weer die deur oopgepluk en dit weer toegemaak.

“Met die deur wat oop en toe gegaan het, het ons nie gehoor die ander een klim agter in nie. Toe ek omkyk was hy agter in die middel van die kar, waar hy die handsak tussen die twee voorste sitplekke gegryp en uitgespring het.”

Sonder om aan haar eie veiligheid te dink het sy ook uitgespring, vir haar ma geskree om die deure te sluit en het die twee agterna gesit.
‘n Entjie verder het die een die handsak neergesmyt en het sy gestop om dit op te tel. “In die tyd wat ek gebuk het om die handsak op te tel, het hy ‘n voorsprong gekry.”

Lees ook: VIDEO: Onwettige sandmyn kring uit terwyl impak op omgewing net verder agteruit gaan

Drie skooldogters het haar sien rondkyk en vir haar gesê dat hulle gesien het hoe die twee boewe van hemde verander.

“Die een het ‘n liggroen oorpakjas aangehad. Hy het dié seker uitgepluk in die hardloop.” ‘n Man het intussen met sy voertuig by haar gestop en gevra of hy kan help. Hy het ook uitgeklim en rondgehardloop om te kyk of hy hulle sien, maar die twee diewe was skoonveld.

“Die barmhartige samaritaan het ‘n seer heup gehad, maar hy was steeds bereid om te probeer help. En daarvoor wil ek baie dankie sê. In die deurmekaarspul het ek nooit sy naam gevra nie.”

Een van die skoolmeisies het gesien waar die booswig die beursie neergooi het en me. Nolte het dit opgetel. Maar die R300 kontant en die R200 Powerball wenkaartjies was skoonveld.