Nduli staan tereg op veediefstalklagtes.

Nduli was in aanhouding na sy arrestasie drie weke gelede, maar het verlede week borg gekry.

Hy is gearresteer nadat daar by twee geleenthede onderskeidelik sewe en vyf beeste op mnr. Naas Boshoff se plaas Mooiwater, langs Doornkop, gesteel is.
Die sewe beeste wat gesteel is, is nooit teruggekry nie.

Drie van die ander vyf wat gesteel is, is teruggekry en twee, wat reeds geslag is, se velle en vleis is by ’n slagpale opgespoor.

• Tydens sy borgaansoek het Nduli ’n papier gewys waarop daar ’n aantekening gemaak is dat die beeste, wat by mnr. Boshoff gesteel is, gekoop is by ’n vrou verlede jaar in Oktober.

Daar is geen handtekening by die beweerde kooptransaksie nie.
Die vrou is intussen oorlede en kon nie die transaksie bevestig nie.

Die hof het die dokument aanvaar en Nduli het borg gekry.

Mnr. Boshoff het vir die Observer gesê dat die beeste egter in Januarie hierdie jaar eers by hom gesteel is.

• Verlede week het mnr. Boshoff inligting gekry dat nog ’n bees van hom by ’n informele nedersetting op die plaas, Mooiplaas, rondloop.
Hy en die polisie is Donderdag na die plaas en dit is bevestig dat dit die bees is wat by hom gesteel is.

“Die bees was nie saam met die ander beeste in die kraal gejaag nie en ons kon hom gelukkig laai.”

• Nduli staan ook tereg op ’n saak van 2019 waar beeste gesteel is by mnr. Kallie Erichsen. Die saak, wat in die streekhof aangehoor word, is uitgestel na 4 Julie vir verhoor.

• Mnr. Anthony Boucher (privaat ondersoeker, SA Investigations and Security) is besig met ’n ondersoek rakende die veediefstalsaak en enige inligting kan aan hom deurgegee word by 071 290 742.