Bestuurder van bakkie wat Melissa doodry gaan hom glo oorgee
Sedert die ongeluk het verskeie inwoners navore gekom met inligting en dit is volgens gerugte juis die bakkie bestuurder se vriende wat hom weggegee het.
’n Jong man gaan hom glo vandag aan die polisie op Middelburg oorgee na die dood van Melissa van der Westhuysen (35).
Melissa is Saterdagoggend om 01:00 deur ’n bakkie doodgery in ’n tref-en-trap ongeluk.
Sy is is in die teenwoordigheid van twee van haar medewerknemers by die kuierkroeg wat bekend staan onder inwoners as die reserviste kantien (Kantienklub 31) op haar bromponie raakgery op pad huistoe na hulle skof as kroegdames.
Die bestuurder van ’n wit dubbelkajuit bakkie het van agteraf in Melissa vasgery in Lilian Ngoyistraat.
Die botsing was so gewelddadig dat Melissa volgens bewysstukke op die ongelukstoneel op die bakkie geval en meters verder eers op die teerpad beland het. Sy is op die toneel dood verklaar.
Die bestuurder het daarna oor die rooi verkeerslig in Proteastraat gejaag en tot gister verdwyn.
Haar twee medewerknemers het voor haar gery.
Melissa was ’n enkelma van ’n 15-jarige seun.
Sedert die ongeluk het verskeie inwoners navore gekom met inligting en dit is volgens gerugte juis die bakkie bestuurder se vriende wat hom weggegee het.
Elmarie Nel het gisteraand op sosiale media gesê “ons het klaar baie inligting, geregtigheid sal geskied. Ons weet wie die bestuurder is hy moet net terug kom dorp toe, die lafaard het die dorp verlaat maar sy pelle het hom weggegee, so hy sal aan die pen ry binnekort”.
Oomblikke later het sy geplaas “en daar is hy gekry, dankie Here, more sal geregtigheid geskied, rus sag Melissa”.
Volgens inligting het die jong bestuurder na Langebaan gevlug maar gaan hom vandag aan die polisie oorgee op Middelburg.
