Marietjie Britz (Amora Dierepark) en Johan Janse van Rensburg (Middelburg Stasie) is raadop met haweloses wat op ’n bykans daaglikse basis gemors op die hoek van Meyer- en Weeberstraat aan die brand steek.

Die rook trek oor tot by die Middelburg Dierepark, wat op die stasieperseel geleë is en is ’n irritasie vir personeel en besoekers.

Hulle kan sien die rook pla die kinders as hulle die diere kom voer en Marietjie is oortuig daarvan dat dit die diere gaan begin affekteer.

“Ek glo op die lange duur gaan dit ook nadelig vir die diere wees!” het sy omgekrap gesê.

Johan het in die week met ’n brandblusser gehardloop om die brandende gemors dood te spuit.

“Hulle kom met hul winkeltrollies vol swartsakke na die hoek toe, kyk wat hulle kan gebruik en steek die res aan die brand. Daar is van plastiek tot kragkabels en blikkies tussen die gemors. Dit maak ’n dik swart wolk wat ons almal se neuse brand en sinus veroorsaak!”

Hy noem dat dit gereeld ook soos geweerskote klink as van die deodorant- en ander aerosolblikkies ontplof in die vuur.

• Hulle bel weekliks die munisipaliteit om die probleem aan te spreek.

“Die wetstoepassers kom uit en verjaag die mense en maak skoon, maar more is die groep met hul gemors maar net weer terug. Ons weet nie meer wát om te doen nie!”