Vir Jemél Jacobs was daar net genoeg tyd om ’n karstoeltjie te gryp, voordat die gesin se huis in Van Elderstraat in ’n verwoestende brand vernietig is.

Een van die mees sentimentele items in die huis wat sy nie kon red nie, was haar trouskildery.

Maar nou het Fransie Venter aangebied om weer vir Braam en Jemél ’n trouskildery te verf.

“Die feit dat Jemél genoem het dat hul trouskildery ook in die brand verwoes is, wys vir my sy het baie sentiment daaraan gehad. Dit is hoekom ek dit as ’n guns vir hulle wil doen,” het Fransie vanoggend gesê.

Fransie het die berig op die webtuiste gelees van Braam en Jemél wat alles verloor het toe hul huis in Van Elderstraat, Gholfsig, Maandag afgebrand het.

“Dit moet vir hulle baie traumaties wees, want hulle gaan van hulle goed nooit weer terugkry nie. Ek weet dit is aardse goed, maar dit bly sentimenteel, want daardie herinneringe is nou weg.”

Jemél was sprakeloos toe die joernalis haar bel en sê dat Fransie hul troufoto weer wil skilder.

“Ek het nie woorde nie, ek kan net dankie sê…” het sy emosioneel geantwoord.

• Fransie het ’n skildery vir past. Danie Venter en sy vrou geskilder en sy het die foto van haar saam met die Venter gesin by die skildery, goedgunstiglik beskikbaar gestel vir publikasie.