’n Trok is Donderdag in Hendrina gekaap en ure later verlate tussen Hendrina en Middelburg, met die trokdrywer vasgebind nog binne-in, gevind.
Die trokdrywer is by ’n stopstraat in Hendrina oorval. Die kapers het hom vasgebind en in die rigting van Middelburg gery.

Die polisie en opsporingsmaatskappy het egter blitsig reageer en in die rigting van Middelburg gejaag.

Die kapers het besef hulle word agtervolg en het uitgespring en gevlug. Dit is onduidelik of hulle met ’n voertuig of te voet weggekom het.

• Daar word verneem dat die eienaar van die trok nie ’n saak wou open nie, omdat die trokdrywer nie beseer is nie en daar nie skade is op die trok nie.
Die rede wat aangevoer is, is dat hy nie kan bekostig om sonder die trok klaar te kom terwyl die polisie die voertuig skut om dit deur te gaan vir leidrade (soos vingerafdrukke) nie.