Gister was Dennesig die hele dag sonder water en alhoewel daar beloof is dat die water teen 20:00 sal terug wees, het dit eers vanoggend 02:00 aangekom.

Inwoners het teen die Steve Tshwete Munisipaliteit te velde getrek en die algemene boodskap was: “Ons is gatvol!”

Oral bars pype en met die erge probleem van kabeldiefstalle kan daar ook nie voorgebly word om die krag aan te hou nie.

Saterdagaand het ’n vrou uit moedeloosheid ’n joernalis gebel omdat sy nie meer geweet het wat om te doen nie.
’n Kabel is gesny tydens beurtkrag Saterdagoggend op die hoek van Plein- en Suidstraat.

Dit is talle kere gerapporteer en daar is selfs die hulp van ’n privaat elektrisiën ingekry om te gaan kyk.

“Die klagtelyn het later nie meer geantwoord as ek probeer bel het nie. As ek van ’n ander foon af gebel het en hulle antwoord, het hulle net die foon neergesit,” het die vrou (wat verkies om anoniem te bly) gesê.

Sy was rasend van bekommernis, want die een kragkabel was lewendig en het die elektrisiën vir hulle gesê dat as ’n kind daaraan sou raak, sou hy beslis doodgeskok word. Die vrou het kort-kort mense wat verby geloop het, gewaarsku om nie naby die kabel verby te stap nie.

Na aanhoudende navrae deur raadslede San-Mari Wait en Hennie Niemann, is die kabel teen 20:30 Saterdagaand herstel en het die gesin krag gehad.

• Die Dierebeskermingsvereniging het vanaf Sondag tot Dinsdag nie water gehad nie. Van Dinsdagoggend af het hulle ook nie krag nie.

• Die klagtes is deurgestuur na die munisipaliteit se mediakantoor.