Vrou en week-oue babatjie vlug voor vlammehel
Talle inwoners het na die toneel opgeruk om die brand met tuinslange te blus.
’n Jong gesin is dakloos gelaat nadat hulle huis in Vygiestraat minute gelede deur vlamme verswelg is.
Met die Middelburg Observer se aankoms, is daar vertel dat ’n vrou met ’n week-oue baba van die toneel af weggeneem is en dat die jong ma aan erge skok ly.
Talle inwoners, die Middelburg Brandweer en lede van Noodroep Radiogroep Sektor 4 asook Middelburg Dagpatrollie het na die toneel opgeruk waar daar met tuinslange gehelp was om die vlamme te blus.
Me. Carla Kamffer het die Middelburg Observer op die toneel genader, waar sy vertel het dat haar seun, sy vrou en hulle jong babatjie in die huis woon.
“My skoondogter sit met ’n baba van ’n week oud, en sy is in ’n toestand hier weggeneem.”
Met die Middelburg Observer se aankoms was die brandweer reeds op die toneel waar die ergste vlamme reeds geblus is.
Die huis het geweldig skade gely, met ’n groot deel van die leefarea wat vernietig is.
• Dit is tans onbekend hoe die brand ontstaan het en wat die gesin alles in die vlammehel verloor het. Daar sal op ’n latere stadium opgevolg word om te hoor hoe die gemeenskap die gesin bystaan.
