Dit moet ’n gesig wees wat jou sal laat kyk, weer kyk en dan laat wonder of Leon Schuster besig is met ’n nuwe truukfliek.
Boonop gaan die passasier in die voertuig langs jou nie sê môôôre nie, maar blêêê..rie diewe!
’n Lid van die Sekhukhune blitspatrollie was op pad na Tubatse vir ’n afspraak toe hy ’n Toyota Fortuner met getinte vensters opmerk wat verdag lyk.
Toe hy die voertuig tot stilstand dwing, het een van die vier mans passasiers uitgespring en die hasepad gekies.
Maar daar was nog 13 ander passasiers in die Fortuner, boerbokke!
Die boerbokke was beslis nie rylopers nie, want die dwelms en speelgoedgeweer wat ook in die voertuig gekry is, dui daarop dat die mans by onwettighede betrokke is.
Die mans is aangekla vir die besit van vermoedelik gesteelde eiendom.
Die boerbokke se eienaar is nog soek.
