‘n Veertienjarige seun is vanmiddag dood nadat hy in ‘n gat naby die Nasaret begraafplaas, tussen Nasaret en Uitbreiding 24, geval het.

Alle aanduidings is dat hy moontlik verdrink het in die poel water wat tussen die hope grond gevorm het.

Van die Nasaret inwoners het lank op die toneel gestaan. Van hulle het kwaad gesê dat hulle al verskeie kere navraag gedoen het oor die gate en die hope grond wat al vir maande lank so lê.

“Daar is nêrens waarskuwingsborde aangebring nie en dit was baie onveilig daar. Nou is daar ‘n kind dood!”

‘n Jong seun, wat ook tussen die omstanders was, het vertel dat die seun wat gesterf het, lief was vir swem. “Ek het gehoor hy het in die water geklim om te swem, maar kon weens die steil kante nie uitkom nie.”

• Daar is verneem dat familie van die seun wel op die toneel was en deur die polisie en ambulanspersoneel ondersteun is.