’n Inwoner van Zuidstraat, mnr Henk le Roux, vertel dat sy huurder ’n senuweewrak is nadat die verdagte gepoog het om by haar woning in te breek deur die motorhuis oop te forseer.

Die vrou se angsbevange gille het vinnig aandag getrek en verskeie mense, insluitende mansonderwysers van Laerskool C.R. Swart, het die vrou te hulp gesnel.
Die verdagte het toe soos blits op die vlug geslaan.

Volgens mnr. Le Roux kon die groep onderwysers daarin slaag om die verdagte in ’n naburige erf vas te keer, en hy is aan die polisie oorhandig.
Die laerskool wou egter geen kommentaar lewer nie.

Die verdagte is aangekla en sal more oggend in die hof verskyn.

Hy kan eers met sy hofverskyning geïdentifiseer word.