Geen saak kan gemaak word nadat gesteelde wielvellings teruggekry is nie, aangesien die eienaar daarvan verlede week weens Covid nagevolge oorlede is.

Mnr. Hans du Preez (Titon) sê personeel van Midtest het hulle vanoggend gekontak en gesê daar is mense wat wielvellings op ’n trok laai naby die ou silo’s in Middelburg.

Titon reaksielede het hulle soontoe gehaas en net die eienaar van die trok daar gekry.

Hy het vir hulle gesê dat ander mans hom net gehuur het om die wielvellings na ’n skrootmetaal besigheid te vervoer.

Die mense wat die vellings opgelaai het, het weg gehardloop voor die reaksielede opgedaag het. Daar is ook wielvellings in die veld gekry, waar die booswigte dit versteek het.

Mnr. Du Preez meld dat hulle die area gefynkan het en verneem het dat die vellings (17 in totaal) gesteel is by ’n besigheid in Weberstraat.

Met hul aankoms daar, het een van die buurbesighede vir hulle gesê dat die eienaar van die besigheid waar die wielvellings gesteel is, ’n Nigeriër, verlede week oorlede is.

Hy het weens nagevolge van Covid gesterf.

“Ons kon nie ’n saak open nie, want die klaer is oorlede.”

Die span van Titon het die gesteelde wielvellings teruggeneem na die besigheid.

Daar is verneem dat die oorledne se familie in kennis gestel is van sy afsterwe en dat hulle van Nigerië af sal kom om die artikels in die winkel uit te sorteer.