’n “Bloedstollende” geroep om hulp het inwoners van Kanonkop gisteraand koue rillings gegee.

Daar is dadelik op noodgroepe vir hulp gevra “oor ’n man wat verskriklik gil.”

“Word hy aangeval?” het iemand gevra.

’n Ondersoek het bevind die “hêêêllpp”… is eintlik “mêêê…”

Die benoude gille kom van boerbokke wat in die woonbuurt agter in ’n erf aangehou word.

Die inwoner roep die bokke en hulle antwoord elke keer met daai skril “mêêê…”

* Die erge geskree wat gister en vanoggend in Vygiestraat gehoor is, was gelukkig geen nood nie. Dit is ’n man wat na sy boerbokke roep en hulle hom dan al blêrend antwoord.

Daar is gister op die Vygiestraatgroep en die Dagpatrollie-noodgroep vir hulp gevra nadat ’n man “benoud geskree het”.

Lede van die Dagpatrollie het op en af in Springbokstraat gejaag, maar kon nie die man in nood opspoor nie.

Vanoggend is die geskree weer gehoor, waarna ’n inwoner van Vygiestraat oor ’n muur geloer en gesien het hoe ’n man op sy boerbokke skree. Daar is vier bokke opgemerk.

Die man, wat in Springbokstraat bly, het gesê dat hy die bokke ‘roep’ en dat hulle hom dan ‘antwoord’.

•Die Middelburg Observer is na die huis maar die eienaar het nie reageer op die koerant se geroep nie.