Nog voor sonop Maandag, het een van die personeellede van Mbidi besef die hek van Leo se hok staan oop.
Hy het dadelik probeer kontak maak met mnr. Frikkie Tolmay, Mbidi Lodge bestuurder, maar weens swak sein, kon hy hom nie in die hande kry nie.

Leo se spoor is gevat om te kyk in watter rigting hy gestap het.

Intussen het mnr. Pieter Nel, besturende direkteur van De Wagendrift Boerdery mnr. Tolmay gekontak, om hom te laat weet dat een van sy werknemers ’n leeu langs die lyndraad gesien het.

Mnr. Tolmay het die Mbidi Lodge personeellid gekontak wat op die leeu se spoor was, waarna vasgestel is dat hy by die ingang van De Wagendrift Boerdery is. Die veearts, dr. Andrew Baker, het hom ná die toneel gehaas.

Mnr. Nel en Andrew Barker (beide van De Wagendrift Boerdery) het hul bakkies langs Leo parkeer, wat ewe bedees die omgewing bekyk het.
Die pad is ook aan beide kante blokkeer om te voorkom dat enige verkeer die leeu steur.

Nadat Leo verdoof is, is hy deur die De Wagendrift-bestuur en werkers op ’n voertuig gelaai en terug vervoer na Mbidi Lodge.

Die grendel waarmee die hek van sy hok toegemaak word het geknak, waarskynlik weens erosie, aangesien hierdie een van die eerste hokke op die lodge is.
Intussen het Mbidi al die hokke se hekke nagegaan om te verseker dat soortgelyke voorvalle nie weer plaasvind nie.

Leo is handgrootgemaak en het ’n baie liefdevolle geaardheid. Hy is dol oor melk en kaas.

In ’n verklaring ná die voorval, het mnr. Nel sy dankbaarheid uitgespreek vir die vinnige reaksie, optrede en samewerking van die plaaswerkers en die veearts.