Inwoners van Aerorand was gistermiddag in rep en roer omdat ’n wooneenheid by die Damsig-woonstekompleks “aan die brand was”.

Omdat daar nie toegang was tot die kompleks nie en die eenheid waar daar rook uitgeborrel het se deure en vensters dig toe was, is gevrees vir die bewoners se veiligheid.

Die brandweer is gekontak en die opsigter het gaan ondersoek instel.

Die dik swart rookwolke het inwoners oortuig dat die woonstel aan die brand is.

Almal was verstom toe hulle uiteindelik die oorsaak van die rookwolke opspoor: ’n seun wat besig was om sy ou skoolboeke te verbrand!
Hy en sy ouers is betig en hy het die brand gestaak.

Dit moes ’n erge jaar vir die leerling gewees het om so gou sy boeke in vlamme te laat opgaan, want die matriekeksamen het maar eers hierdie week begin.