“Hy was liefde,” sê Marlene Koekemoer van haar oorlede man Gawie, ’n Majoor in die weermag wat jarelank op 4 SAI gestasioneer is, en op 17 November vanjaar oorlede is na ’n lang siekbed.

Soldate het Woensdag erewag vir die ontslape Majoor gestaan tydens ’n hartroerende roudiens op die basis.

Hy was 36-jaar lank verbonde aan die SA Nasionale Weermag in verskillende hoedanighede, onder meer opleiding.

’n Hartseer Marlene sê dat Majoor Koekemoer grootgeword het op Waterval Boven, en sy weermag opleiding by die 1 SAI weermaginfanterie op Bloemfontein ondergaan het, voordat die Koekemoers in 1999 Middelburg toe verhuis het.

Marlene sê Gawie was ongeveer ’n jaarlank siek, nadat sy gesondheid agteruit begin gaan het weens Covid.

In Meiemaand het hy ’n ernstige terugslag gehad met twee hartaanvalle kort na mekaar.

Vroeër die maand het lewerversaking sy gesondheid negatief begin aantas waarna hy ook vog op die longe opgedoen het.

Sy niere het ook begin ingee voor sy afsterwe.

’n Roudiens is ook vandag, om 11:00 vanuit die Hervormde Kerk Moedergemeente gehou.

Majoor Koekemoer het gereeld langs die viswaters uitgespan saam met sy gesin, en was ook ’n kranige jagter.

Hy laat sy vrou Marlene, seun Ambo (23), dogter Mekyla (20), broer Martin en susters Lollie en Corrie agter.

“Ons salueer hom vir die liefde waarmee hy ons as gesin oorlaai het, ons gaan hom oneindig mis,” sê Marlene.