Bekende oudpolisieman neem sy eie lewe

Mnr. Rheeder se vrou, Tersia, het vanoggend gesê dat hy die afgelope tyd baie depressief en angstig was en op ’n tydstip ook 10 dae behandeling in die Denmar Sentrum gekry het.

“Sy pille is verander en hy het baie angstig geword. Ons was verlede week weer by die psigiater en daar is weer vir hom pille gegee.”

Me. Rheeder het genoem dat hulle ’n tweede opinie wou kry en ’n afspraak is gemaak met ’n internis, wat hulle dié week Donderdag by die Unitas Hospitaal sou gaan sien.

Hulle sou more ry tot by haar seun, wat in Gauteng bly, daar oorslaap en dan die internis die volgende dag sien.
Gisteroggend het sy om 09:00 gou dorp toe gery om ’n paar goedjies te gaan koop.

“Hy het soos altyd vir my gesê: ‘ek is lief vir jou, sien jou netnou.”

Met haar terugkeer omstreeks 11:00 was hy reeds dood. Daar word verneem dat hy homself met ’n klein kaliber pistool om die lewe gebring het.

“Gerhard wou nie verder baklei nie. Die dokters kon hom nie gesond kry nie. Hy was moeg. Dalk sou die internis hom kon help.”

Die egpaar ken mekaar al 30 jaar en sou in April 24 jaar getroud gewees het.

“Gerhard en ek was soos vinkel en koljander. Ons kon nie sonder mekaar klaarkom nie. Hy was ’n goeie mens. Hy was spontaan en liefdevol. Ek kon nie vir ’n beter man gevra het nie.”

Mnr. Rheeder was vir 40 jaar ’n polisieman waar hy tot met sy aftrede ’n kaptein was by die logistieke afdeling.
Hy het die eiendom bestuur waar die Openbare Orde Polisiëring (ou Eenheid 7) geleë is en was ook die sekretaris van die offisierskantien.

Na sy aftrede het hy vir Wiley Harrington gewerk waar hy vir nog 13 jaar van hul eiendomme bestuur en koerierwerk gedoen het.
“Gerhard het vier jaar gelede eers finaal afgetree,” onthou me. Rheeder.

Hy word oorleef deur Tersia, kinders, kleinkinders en sy suster Naomi.

• Daar is nog nie begrafnisreëlings getref nie.

• Mnr. Rheeder se dogter, Ciretha, wat self as burgerlike vir die polisie gewerk het, is twee jaar gelede oorlede en familie onthou hoe hard dit hom getref het.

• Sy broer, Riaan, was jare gelede by die Middelburg Honde-Eenheid en is later Walvisbaai toe. Hy is in dié dorp deur ’n hekwag doodgeskiet.

• Sy pa, Gerhard, wat bekend was as Gerrie, was ook aan die polisie verbonde.