KYK: “Waar is wetstoepassing?” – Onwettige herwinningsprojek steeds langs rivier
Inwoners wonder hoekom die munisipaliteit steeds nie opgetree het teen die onwettige glasherwinningsbesigheid langs die Klein Olifantsrivier in Asaliastraat nie?
Die munisipaliteit het verlede week reeds toegegee dat die herwinningprojek onwettig is en dat die betrokkenes daar verwyder sal word.
Hulle is glo ook vantevore reeds uit ’n ander area rondom die Kees Taljaard Stadion verwyder, waarna hulle bloot geskuif het na die draai in Asaliastraat.
Die herwinnaars slaap selfs daar, wat ook onwettig is.
Daar is geen toiletgeriewe nie en DA raadslede Helda de Klerk en Johann Dyason sukkel al sedert Desember verlede jaar om die herwinningsprojek stopgesit te kry.
Die kamp waar die glas gemaal word, omdat kopers dit in poeiervorm soek, is boonop ver onder die vloedlyn.
Die herwinnaars het druk op raadslid De Klerk geplaas om die projek as deel van die munisipaliteit se “Adopt-a-Spot” gemeenskapsprojek goed te keur.
“Hulle doen dit vir wins en behoort toegang gebied te word tot industriële areas deur die munisipaliteit wat werkskepping betref,” sê raadslid De Klerk.
“Die boodskap wat die munisipaliteit hier stuur deur apaties te staan, stuur ’n gevaarlike boodskap dat sommige mense kan wegkom met onwettige aktiwiteite en ander nie,” sê sy.
@middelburgobserver DA raadslid Helda De Klerk besoek die onwettige glasherwinningsbesigheid langs die Klein Olifantsrivier. #Middelburg #KleinOlifants #Besoedeling #Pollution
