Phillip Rudolph de Klerk is eers aangekeer nadat Afriforum se privaat vervolgingsgesag die saak laat hersien het.

Gerhard is op 27 April daardie jaar tussen partytjiegangers in Walter Sisulustraat doodgeskiet.
Sy seuntjie, Ronaldo, toe net drie jaar oud, het alles sien gebeur.

Na die voorval is daar op die toneel gesê dat rowers op hom los gebrand het.

Sy vrou, Bianca, het egter kort daarna onthul dat dit nie die geval was nie, maar dat ’n persoon by die partytjie met ’n wapen gespeel het.

’n Skoot het afgegaan en is deur ’n buitekamer venster.
Die tweede skoot het Gerhard getref, wat net etlike treë geloop, geval en gesterf het.

Sy het destyds gesê dat die persoon wat vir haar man se dood verantwoordelik was, gesê het sy moet jok oor wat gebeur het.

Volgens haar het hy gesê hy sal sorg vir haar en haar kinders as sy sou sê rowers het hom geskiet.
Sy het ook beweer dat hy gedreig het dat as sy dit nie doen nie, dat hy sal sê sy het haar man geskiet.

Met die polisie se aankoms op die toneel, was die vuurwapen reeds weg.

’n Persoon, wat by die partytjie was, het ook weg gery van die toneel af en later terug gekom.

Na die gebeure het ’n Middelburg Observer joernalis ’n dag of twee later met De Klerk gaan praat oor die voorval en het hy ook volgehou dat dit ’n rower was wat vir Gerhard geskiet het.

In November 2023 is De Klerk gearresteer en op 16 November het hy die eerste keer in die hof verskyn. Tydens sy vorige verskyning in Desember, is die saak uitgestel na die streekhof.

• Die saak is vandag weer uitgestel na ’n later datum hierdie maand vir afskrifte van die dossier.
De Klerk bly in aanhouding.