•Olifante op ons voorstoep.

•Miljoene vir toerisme.

•Die ontsluiting van die enorme toerisme potensiaal wat die Loskop Vallei bied.

Dit is wat die volgende paar jaar op die Middelburg/Groblersdal toerismeroete wag.

Daar is groot veranderinge in sig vir veral die Loskop Natuurreservaat na ’n finansiële inspuiting van R120 miljoen deur die Aspinall Stigting.

Die Mpumalanga Toerisme en Parke Agentskap het ’n ooreenkoms met die Aspinall Stigting en hulle plaaslike filiaal, WeWild Africa, aangekondig as die eerste van sy soort, waarin die provinsiale bewaringsagentskap in samewerking met internasionale nie-winsgewende stigtings sal optree.

Die skenking van R120 miljoen sal bydra tot die ontwikkeling van bestaande infrastruktuur, die bevordering van natuurbewaring en die stimulasie van die plaaslike ekonomie.

Volgens beriggewing deur die IOL, is die ooreenkoms vir 25-jaar, en beoog die MTPA om sy grondgebied van 23 500 hektaar te vergroot met omliggende areas as een van Suid-Afrika se grootste Groot Vyf wildreservate.

Verskeie wildspesies sal ook ingebring word, wat olifante, swart renosters, leeus en jagluiperds insluit.

Hekzin Vilikazi, hoof uitvoerende beampte van MTPA, het in ’n persverklaring gesê hulle beoog om die reservaat te vergroot na minstens 100 000 hektaar, deur gemeenskaps- en privaat grond in te sluit as deel van die wildreservaat.

Die ooreenkoms dien as ’n projek vir toekomstige vennootskappe tussen parkeraad en private stigtings.