Paramedikuste het William op 17 Maart te hulp gesnel waar hy in die straat gelê het en baie siek was. Hulle het hom per ambulans Middelburg Hospitaal toe geneem.

Met sy opname was hy duiselig en het bloed opgebring.

Nadat hy gestabiliseer is, het William sy naam en van aan hulle verskaf en het gesê dat hy gebore is op 5 Oktober 1968.

Hy het vertel dat hy haweloos was en in die sentrale sakekern op straat gebly het.
Hy kon nie kontakbesonderhede verskaf van enige familielede nie.

William het twee dae later weens die siekte gesterf en is sy oorskot sedertdien in die lykshuis van die Middelburg Hospitaal.

Die hospitaal doen ’n beroep op enige naasbestaandes om na die hospitaal toe te kom om hom uit te ken en sy liggaam op te eis vir ’n begrafnis.