’n Groot aantal joernaliste van Mpumalanga, Gauteng en Limpopo het verlede Donderdag weer by Olifants River Lodge aangemeld vir die jaarlikse No Guts, No Glory-seminaar wat van ervare joernaliste, tot studente in joernalistiek aan die Noordwes Universiteit en Akademia ingesluit het.

Die plaaslike berader en terapeut, Elaine Putter, het vanjaar die ys gebreek met haar praatjie “Jy is die stem.”
Dit het gehandel oor die verskillende lae, soos omgewing, geloof, liggaamlike gebrekke en geestesversteurings wat elke mens uniek maak.
Die raad was om alle lae van menslikheid in ag te neem, bo persoonlike gevolgtrekkings in joernalistiek.

Vrydag se program het afgeskop met die adjunk uitvoerende hoof van die Forum vir Gemeenskapsjoernaliste, Marietta Lombard, wat gesels het oor die toekoms van drukmedia, en die belangrikheid van samewerking in die kwynende bedryf.

Na Lombard het André Gouws, lektor in tale en kulturele studies aan die Akademia Universiteit, meer lig gewerp op vanjaar se Forum vir Gemeenskapsjoernaliste se FCJ-toekennings, met Avbob as hoofborg. Tydens die toekennings is Daleen Naudé en Matthew Handley van die Middelburg Observer onder andere bekroon is as Joernalis van die Jaar en Opkomende Joernalis van die Jaar.

Gouws se kommentaar oor vanjaar se wen-inskrywings het talle studente en beginner joernaliste ’n blik gegee op die beoordelingsproses, en watter slaggate om te vermy.

Rianette Cluley, uitvoerende hoof en hoofredakteur van Briefly News, het kunsmatige intelligensie bespreek na Gouws, en meer vertel oor hoe die media daarby kan baat, soos om vrae te formuleer vir onderhoude.

Die laaste spreker was die bekroonde fotograaf Yolanda van der Stoep, wat oor vanjaar se wenfotograwe se fotoportefeuljes in die FCJ-toekennings gesels het, met die wenfotograaf Wayne van der Walt se insette.

• Die seminaar is gelei deur Caxton se groepredakteur, Irma Green.

• Die mandjie van sprekers het dekades se kundigheid na die tafel gebring en Olifants River Lodge was andermaal ’n welkome gasheer.

• Wayne van der Walt (redakteur, Highvelder) het die foto’s tydens die seminaar geneem.