Die personeel van Life Midmed Hospitaal het Vrydag agt keer Nollie Venter (60) se hart weer aan die gang gekry nadat dit gaan staan het. Later dieselfde dag is hy in die Wilgers Hospitaal oorlede.

Sy dogter, Charlene, sê haar pa het nie lekker gevoel nie en is hy die oggend van die spreekkamer af hospitaal toe.

Met sy aankoms by die hospitaal het hy inmekaar gesak en het sy hart die eerste keer gaan staan. Daarna het dit nog sewe keer gebeur en het die dokters en personeel van Life Midmed Hospitaal sy hart weer aan die gang gekry.

Hulle is meegedeel hy het ’n bloedklont in die long en is kort daarna oorgevlieg na die Wilgers Hospitaal.  ’n Prosedure is gedoen om ’n pypie in die longe te sit en was sy bloeddruk baie laag toe hy uit die teater kom.

Omstreeks 22:30 is die familie laat weet dat hulle moet terugkom hospitaal toe en kort na 23:00 is Nollie oorlede.

Nollie is deur sy familie beskryf as ’n hardwerkende gesinsman wie se vrou, kinders en kleinkinders sy alles was.

Hy word oorleef deur sy vrou, Frances, dogters Charlene en Cherise, skoonseuns Andre en Lourens en kleinkinders Christelene, Charelise, De Wet en Ruben.

Die begrafnisreëlings is nog nie gefinaliseer nie.

• ’n Huldeblyk sal in die Vrydag uitgawe van die Middelburg Observer verskyn.