Anelle het bygevoeg dat haar ma ‘n skittervrou was. “Sy was so ‘n omgeevrou wat alles vir ander gedoen het. Haar plek is leeg, maar haar legendariese nalatenskap gaan definitief voortleef in ander. Rus in vrede liefste Mamma.”

Vriendin stort haar hart uit

Annette se vriendin, Kathy Erichsen, het gesê dat sy ‘n huldeblyk skryf, “aan ‘n baie spesiale mens in my lewe. Annette vandat jy by Ouklip VLU aangesluit het, was jy nog altyd soos nog ‘n suksie in my lewe, die een met die baie geduld.

“Sy was nooit te besig om te luister nie.

“Annette was altyd goed op datum met haar werk, admin, kompetisie-artikels, verslae…sy was so ‘n perfeksionis.

“In haar het ek altyd die voorbeeld gesien van waardigheid en vroulikheid en sy kon so lekker lag met daardie spesiale glimlag. Ons sal haar almal so baie mis.

“Haar hart was wonderlik, sy het omgegee vir almal, en sy het die Here altyd haar eerste prioriteit gemaak. Haar kerk se mense het sy altyd gehelp en bygestaan tot en met hierdie jaar voor sy siek geword het.

“Ek sal altyd dankbaar wees vir die vriendskap wat ons gehad het en vir baie jare se ondersteuning. Ek en al jou Ouklip vriendinne gaan jou beslis mis.

“Vlieg hoog met die engele my vriendin!”

Annette was 19 jaar deel van die Oukliptak waar sy eers skakelbeampte was. In 2008 het sy die skakeltrofee ontvang. Sy was haar volle termyn voorsitter van die tak en is een jaar aangewys as voorsitter van die jaar by die konferensie.

• Daar is ook ‘n huldeblyk in die Vrydag uitgawe van die Middelburg Observer.