’n Skokkende foto is sopas op die Traffic Alert WhatsApp groep geplaas wat lede van die groep aan die gons het.

Die foto is deur ’n plaaslike motoris geneem by die besige kruising van Lilian Ngoyi- en Cowen Ntulistraat, digby McDonalds.

Op die foto kan gesien word hoe ’n aflewerings-bromponie gebruik word om nie een nie, maar twéé passasiers ’n rygeleentheid te gee.

Wat die plasing egter uiters ontstellend maak, is die feit dat ’n kleuter tussen die drywer en passasier gesien kan word.

Die drywer en sy passasier het beide valhelms aan, maar die kleuter nie!

Woede kring uit oor die foto omdat die aflewerings-bromponies gereeld voor motoriste inry, en ook verkeerstekens verontagsaam.

Dit is tans onduidelik vir wie die afleweraar werk, omdat sy oorpakbaadjie versteek is op die foto.

Moeti Mmusi, mediawoordvoerder van die departement van paaie en veiligheid, het ook met woede daarop gereageer.

“Dis onwettig en dodelik, sulke onverantwoordelikheid kan nie geduld word nie,” sê Mmusi.

Hy het versoek dat die eienaar van die betrokke bromponie, wat duidelik vir besigheidsgebruik aangewend word, streng teen die oortreder optree.