‘n Vroulike sekuriteitsbeampte van Roberts Landgoed is in die been gewond nadat ’n opslagkoeël haar getref het.

Na wat verneem word het ’n besoeker by die ingang van die landgoed in ’n woordewisseling met een van die twee wagte betrokke geraak. Die man het kort daarna uit sy voertuig geklim en glo ’n 9mm-pistool vir die wagte gewys.

’n Skoot is deur dié woedende besoeker afgevuur. Die koeël het vanaf die plaveisel opgeskiet en die vroulike wag in haar linkerbeen getref.
Die man is oorrompel en daar gehou totdat polisie en nooddienste opgedaag het. Paramedikuste van ER24 het die beseerde wag gestabiliseer en haar na Life Midmed Hospitaal afgevoer.

’n Poging tot moordsaak is geopen by die polisie.