Die Middelburg gemeenskap treur oor die afsterwe van Madalane Brits (56), die geliefde verpleegster wat die afgelope paar jaar saam met dr. Theuns Botha by Prime Cure-Medi Centre gewerk het.

Madalane is op 14 November ná ’n kort siekbed onverwags in die Middelburg Hospitaal oorlede.

Madalane was bekend vir haar rustige teenwoordigheid, haar sagte benadering en die manier waarop sy elke pasiënt laat veilig voel het. Vir baie was sy nie net ’n verpleegster nie, maar ’n vertrooster, ’n luisteraar en ’n hart wat nooit te moeg was om om te gee nie.

Sy word oorleef deur haar lewensmaat Beneen, haar kinders Marissa, Tanya en Raymond, haar skoonseuns Danie en Kyle, asook haar vyf kleinkinders wat haar wêreld was.

Haar familie bedank Avbob vir hul sorg en bystand, en spreek hul dank uit teenoor almal wat deel van haar lewe was en hulle nou in hul tyd van rou ondersteun. “Die gemeenskap se liefde dra ons deur die donker dae.”

Haar nalatenskap van sagtheid, diensbaarheid en opregte menslikheid sal lank onthou word.

’n Roudiens word Donderdag, 27 November om 11:00 by die ICSA-kapel (by die Samora Machel begraafplaas) in Middelburg gehou.