Willem Esterhuizen, die verstandelik gestremde jong man wat twee jaar gewag het vir ’n operasie na ’n fietsongeluk, het ná die operasie wat hom moes help, ’n beroerte gehad.

“Willem het van ’n lewenslustige jong man wat gehou het van visvang, verander in ’n klein kindjie wie se hande saamtrek en net in ’n rolstoel kan sit,” het sy ma, Patricia Smit hierdie week hartseer gesê.

Alhoewel dokters vir Patricia gesê het dat hy net ’n ‘ligte beroerte’ gehad het, het alles verander in hul huishouding.

Voor die ongeluk, wat op 25 Oktober 2023 gebeur het toe hy van sy fiets af gestamp is deur ’n voertuig, het Willem karre opgepas en het graag geselsies met almal aangeknoop.

Nou trek sy hande in spasmas saam, hy ken nie eers meer sy ouma of sy beste vriend nie en praat soos ’n driejarige kind.

Daar is talle kere al geskryf oor Willem wat sy enkel sleg gebreek het tydens dié ongeluk in Vosstraat.

Vir twee jaar moes hy daagliks met ’n kruk loop totdat die operasie uiteindelik vanjaar op 13 Oktober in die Witbank Hospitaal gedoen is.

Op 6 November moes Patricia-hulle met hom in die nag na die Middelburg Hospitaal jaag, omdat Willem glad nie gereageer het nie en sy hande saamgetrek het.
Patricia is kort daarna in kennis gestel dat hy die ‘ligte beroerte’ gehad het.

“Die dokter het onlangs vir ons gesê dat Willem nou voltyds sorg gaan nodig hê en dat sulke goed ‘maar gebeur met gestremde mense’. Daar is gesê hy kon die beroerte gehad het weens die pyn en hoë bloeddruk,” meld Patricia.

Sy betaal nou ’n voltydse huishulp om bedags na Willem om te sien terwyl sy werk. “Ek kan dit nie regtig bekostig nie, maar ek kan nie ophou werk nie, ek moet vir my kinders sorg.”
• Patricia het ook ’n ander seun.