Middelburg-mamma: Moeg, máár veg steeds
Middelburg-mamma hou vas aan ’n draadjie hoop – Angelique van Kraayenburg steeds onder sedasie in die Steve Biko Hospitaal, terwyl sy teen ’n longinfeksie, bloedklonte en verskeie ander komplikasies veg.
Die geliefde Angelique van Kraayenburg (40), veg steeds vir haar lewe in die intensiewesorgeenheid van Steve Biko Akademiese Hospitaal.
Sy is onder sedasie terwyl dokters en spesialiste aanhoudend probeer om die ernstige longinfeksie, bloedklonte en ’n reeks komplikasies wat opgebou het, te stabiliseer.
’n Lang pad van pyn en verswakking
Angelique veg al meer as ’n jaar lank teen ’n ongediagnoseerde siekte. Ten spyte van talle toetse kon dokters nie presies vasstel waarom haar liggaam so vinnig verswak het nie. Sy het dramaties gewig verloor, tot net 39 kg, en haar gesondheid het geleidelik agteruitgegaan totdat sy uiteindelik in die intensiewesorgeenheid beland het. Haar toestand het die laaste twee weke kritiek versleg.
Sy moes op ’n ventilator geplaas word, en selfs nadat sedasie kortliks gestop is, kon sy nie wakker word nie. Daarna moes sy weer onder sedasie teruggeplaas word toe haar liggaam weer verswak.
Daar was ook ’n oomblik van uiterste krisis, toe haar hart vir agt minute gaan staan het voor mediese personeel dit weer aan die gang kon kry.
Infeksie en komplikasies
• Haar infeksievlakke bly gevaarlik hoog.
• Haar bloedplaatjies (platelets) het na ’n kritieke vlak van drie gedaal, waar die normale telling ± 150 000 moet wees.
• Dokters het dit intussen tot 53 kon oplig, maar die risiko is steeds groot.
• Sy veg teen ’n hardnekkige longinfeksie.
• Dokters probeer bloedklonte oplos met sterk medikasie en bloedverdunners.
“Al is sy onder sedasie, is sy stééds besig om bitter hard te veg,” sê Claudia Atkins namens die familie. Die familie waak dag en nag by haar. Angelique se verloofde, Pieter Smit, ry steeds elke moontlike kans na werk, vanaf Middelburg na Pretoria om by haar te wees. Haar ouma sit by haar bed en ondersteun die gesin daagliks deur hierdie uitgerekte traumatiese tyd. “Dit is moeilik, maar so lank sy veg, veg ons saam met haar,” sê die familie.
Angelique se BackaBuddy-veldtog dra die gesin tans deur.
Donasies help met
• Vervoer tussen Middelburg en Pretoria.
• Mediese rekeninge.
• Noodsaaklike lewenskostes.
Elke donasie – ongeag hoe klein ook al – maak ’n tasbare verskil.
Die familie vra dat die gemeenskap aanhou hoop, aanhou bid en aanhou ondersteun, want elke gebed, boodskap en bydrae dra hulle deur hierdie ongelooflik donker tyd.
Kliek op die BackaBuddy-skakel om ’n bydrae te maak: https://www.backabuddy.co.za/campaign/help-angelique-get-better
