Oliver kon net-net nie die pyp rook in Dunhill
Korb en Potgieter het ook ’n goeie laaste rondte.
Dit was naby maar tog nie goed genoeg nie.
Die drie gholfspelers met Middelburgse verbintenis, het ’n goeie laaste dag beleef in die Dunhill gholfkampioenskappe by Royal Johannesburg.
Oliver Bekker het sukkel-sukkel begin, maar homsef reggeruk om met -13 te eindig. Hy het die toernooi afgeskop met ’n 66 en dit opgevolg met ’n 67 en vandag ’n 68 op sy telkaart ingevul.
Aldrich Potgieter het self ook met ’n -11 geëindig. Hy het ’n 67 69 en 67 gepeel.
Die oud HTS Middelburg leerling, Ruan Korb, het ’n goeie toernooi beleef en eindig op -2. Sy tweede rondte van 73 het hom aan die hakskeen gebyt, na ’n goeie 68 op die eerste dag. Hy het vandag ’n 71 op sy telkaart ingevul.
Dit is een hou beter as die hoogaangeskrewe Sanjaard Pablo Larrazabal.
Die toernooi is deur die 24-jarige Jayden Schaper gewen met ’n arend op die eerste uitspeel putjie nadat hy en Shaun Norris albei op -16 geëindig het.
Thriston Lawrence van Nelspruit het op -10 geëindig.
Die toernooi is na drie rondtes verkort, nadat die baan Saterdag onspeelbaar was na deurdringende reën.
