Ronel Erasmus (70) die vrou wat ‘n besondere band met haar gesin gehad het, is Sondag in die vroeë oggendure in haar slaap oorlede.

“Sy is in haar slaap, rustig en vreedsaam oorlede,” het haar familie vanoggend gesê. Hulle vermoed sy het tussen 00:30 en 02:30 gesterf.

Ronel was voorheen van Groblersdal en het sy en wederhelf Wynand vanaf 1990 Middelburg hul tuiste gemaak. Middelburgers sal die vriendelike Ronel onthou waar sy vanaf 1991 verbonde was aan Plastic King en later Middelburg Petroleum.

Sy en Wynand, “was kampmal en baie lief vir die see.” Die egpaar was 49 jaar getroud en sou in Maart aanstaande jaar hul 50ste huweliksherdenking gevier het.

Haar gesin onthou haar as, “‘n ferm, maar sagte persoon. Sy was ‘n swart en wit mens, daar was geen grys areas nie. Sy was ook ‘n bok vir sports en baie lief vir haar man, kinders en kleinkinders.”

Buiten Wynand, word Ronel oorleef deur haar kinders Wj, Rolén en Rochel, skoonkinders René, Japie en Ruan, kleinkinders Wijon, Alé, Adriaan, Liané, Arlo en Zia, haar susters, Petro en Mari en broer Hennie.

‘n Roudiens sal Maandag, 29 Desember, om 11:00 op die plaas Rondebosch gehou word. Daar sal nader aan die tyd vir almal wat dit wil bywoon aangedui word waar dit sal wees. Die diens sal ook aanlyn gevolg kan word. Die skakel sal later gedeel word.