KYK: ‘Stille Nag’, kersliggies en mark by Lionspark
Nie eers 'n vinnige bui reën kon Middelburgers se geesdrif demp tydens die liggiefees by die Lionspark nie!
Oud en jonk het gisteraand saamgekuier tydens die Dagpatrollie se kersmark- en liggiefees in die Lionspark in Kanonkop.
Arthur Hill het vanoggend genoem dat hulle bykans 600 lekkergoedpakkies vir die kinders uitgedeel het tydens hierdie gemeenskapsprojek van die Dagpatrollie.
“Dit is ons manier om terug te gee aan die gemeenskap,” het Arthur gemeld.
Die span het gisteroggend al vroeg-vroeg bymekaar gekom om hordes stringe liggies in die die speelpark op te rig. “As jy al die liggies bymekaar gaan sit, sal dit maklik ‘n kilomter lank wees,” lag hy.
Hulle was so bietjie bekommerd toe dit hard begin reën het net voor die liggiefees moes begin, maar nadat dit opgehou reën het, het die mense letterlik in hordes opgedaag.
Veral die kleingoed kon nie wag om Kersvader te ontmoet nie en het die kinders op ‘n stadium in ‘n ry gestaan net om op sy skoot te gaan sit en ‘n pakkie lekkers te kry. ‘n Paar van hulle het ook in sy oor gefluister wat hy vir hulle moet saambring vanaf die Noordpool vir Kersfees.
Arthur noem dat hulle wil hande vat met die sakelui van MIddelburg om volgende jaar ‘n nog groter liggiefees en kersmark aan te bied.
Hy bedank elke persoon wat gehelp het om die liggies op te sit en die gemeenskap sonder wie die aand nie so ‘n sukses sou gewees het nie. “Al die stalletjies het uitverkoop!”
@middelburgobserver Honderde mense het saamgekuier en saam met die kinders ‘Stille Nag..” gesing tydens die Dagpatrollie se liggiefees en kersmark in Lionspark, Kanonkop op 20 Desember.
