Mariska Boshoff (30) het weer ‘n slaapplekkie nadat sy vir ‘n paar weke in die nagte op straat ‘n warm plekkie moes soek.

Sy kan nie genoeg dankie sê vir Steve Hart (‘n inwoner van Kanonkop) nie, want hy het vir haar tydelike blyplek gegee en help haar om weer werk te soek.

Volgens Mariska was haar pa in die polisie in Limpopo en het haar hele lewe verander toe hy in die Covidtyd oorlede is.

Sy het gewerk, maar weens onvoorsiene omstandighede onlangs haar werk verloor.

Op die vraag of sy dwelms gebruik, het sy ‘nee’ gesê. Sy het ook die joernalis gewys hoe netjies haar kamer is waar Steve haar tydelik huisves.

Mariska noem dat sy ‘n onderskeiding behaal het in matriek en ook ‘n kode 10 lisensie het, “maar werk is skaars.”

Vir nou is sy net dankbaar dat sy ‘n dak oor haar kop het terwyl sy vir werk soek.