Daar is oomblikke waar ’n mens nie nóg ’n week, nóg ’n dag of nóg ’n verskoning het nie. Vandag is een van daardie oomblikke.

Die Kersfees Pretdag, wat op 24 en 25 Desember in die Middelburg en Hendrina area plaasvind, gee byna 5 000 kinders iets wat hulle selde kry, aandag, veiligheid, vreugde – en die gevoel dat hulle saak maak. Maar sonder “Buddies” kan hierdie dag nie gebeur nie.

Dit is eenvoudig, maar dringend, hierdie klein kindertjies het vandag mense nodig wat bereid is om op te daag. Nie met geskenke of perfekte antwoorde nie, maar net met tyd, oë wat raaksien en ’n hart wat oop is.

As ’n Kersfees Pretdag “Buddy” kan jy:

• ’n klein hand vat na ’n springkasteel
• toesig hou terwyl kinders speel
• help met kos en water
• of bloot die volwassene wees wat sê: “Jy is veilig.”

Jy hoef nie opgelei te wees nie. Jy hoef nie die hele dag te help nie. Tog kan selfs een uur ’n kind se wêreld groter maak.

Vir baie van hierdie kinders is Kersfees nie liggies en pakkies nie, dis net nóg ’n dag. Jou teenwoordigheid kan daardie dag verander in ‘n dag van lag waar daar stilte was, veiligheid waar daar onsekerheid was en herinneringe wat lank ná Kersfees sal bly.

Die vrywilligerlyste sluit vandag.

Elke naam wat bykom, beteken dat een kind minder verlore raak in die skare. As jy al ooit gewonder het of jy ’n verskil kan maak is hierdie jou antwoord.

Vandag kan jy ’n lewe aanraak. Môre is dit dalk te laat.

Om ‘n Pretdag “Buddy” te wees, skakel:

Zamakoena: 078 654 8327
Phumelele: 067 902 4873