’n Hartseer eienaar doen ’n dringende beroep op die Middelburg-gemeenskap nadat haar geliefde kokketiel, Pollie, ‘n week gelede uit sy hok gevlieg het.

Pollie het by die Aerorand area in Bamboesbergstraat, vermis geraak en is sedertdien nog nie opgespoor nie.

Wat hiérdie situasie van erns maak, is dat Pollie die enigste voëltjie is wat sy babatjies in die nes gevoer het. Die wyfie weier om kos te gee, wat die eienaar genoop het om die kleintjies self uit die nes te haal en met die hand te voer.

“My hart is so seer. My ‘baby’ is daar buite in die wind en weer,” sê die eienaar emosioneel.

Pollie is nie net ’n troeteldier nie, hy is die “pappa van die hok” en oók die heel eerste kokketiel wat die familie gekry het. Elke voëltjie in die hok het ’n naam en word as deel van die gesin beskou.

’n Beloning word aangebied aan enige persoon wat Pollie kan vang, sien of inligting kan gee wat sal help om hom veilig huis toe te bring.

Die familie vra die publiek om asseblief hul oë oop te hou, veral in tuine, bome en buitehokke in die Aerorand-omgewing. “Hulle is soos kinders vir ons. Ons mis hom vreeslik en sy maatjie mis hom net só baie.”

Enigiemand wat Pollie gesien het of moontlik kan help, word dringend versoek om Wilma te kontak.

Skakel: 082 523 2673